Gure Balioak ekimenak bilera deitu du astelehenerako balioen transmisioaren gaineko hausnarketa egiteko asmoz

DEBEGESA garapen agentziak, Debabarreneko eskualdean ekintzailetasuna, errespetua, lankidetza-elkarlana eta integritatea bultzatzea xede duen Gure Balioak ekimenaren baitan, hezkuntza komunitateari zuzendutako hainbat hausnarketa-foro burutu ditu.

Bilera hauek gizarte-balioen transmisioaz hausnartzea izan dute helburu, eta hezkuntza komunitateak haur eta gazteei balio hauek transmititzerako orduan izaten dituzten hutsune edota zailtasunak identifikatzea.

Guztira 7 bilera egin dira, komunikabideekin, aisialdi taldeetako ordezkariekin, kirol elkarteekin, eskola kontseiluetako kide diren udal ordezkariekin, adinekoekin eta gurasoen elkarteetako ordezkariekin, gurasoekin eta ikastetxeetako irakasle eta zuzendaritzako kideekin.

Honela, datorren astelehenean, hilak 27, 18:00tatik aurrera, azken bilkura egingo da Debegesan. Saio honetan aurreko ekimenetan partaide izan direnak elkartzeaz gainera, ekarpenak egin nahi dituzten herritarrek ere izango dute bertaratzeko aukera.

Bilera honetan orain arte egindako proposamen guztien aurkezpena egingo da, lehentasunak ezarriko dira eta etorkizunera begira, akzio-plan bat definituko da.

Parte hartu nahi dutenek izena eman behar dute 943 82 01 10 telefonora deituz (Ainara Garcia) edo balioak@debegesa.com helbidera idatziz.

Parte-hartzerako tresnak

Gure Balioak proiektuak webguneaz gainera, www.gurebalioak.com, baditu bestelako komunikazio kanal batzuk herritarren partaidetza sustatzeko eta eztabaidarako, hala nola, Twitter (@gure_balioak) eta Facebook (www.facebook.com/gurebalioak) sare sozialak.