Jesus Bilbao, Gure Balioak Saria 2012
Gure Balioak Sariaren III. edizioan, Jesus Bilbao Azpiri elgoibartarrak jaso du errekonozimendua, enpresaren alorrean batik bat egindako lana eta ekarpena goraipatuz. Sari-emate ekitaldia atzo arratsaldean egin zen, urriak 18, Elgoibarko Inazio Bereziartua Musika Eskolan, Debegesa Garapen Agentziak antolatuta eta Gipuzkoako Foru Aldundiko Berrikuntza, Landa Garapen eta Turismo Sailak, Elgoibarko Udalak, Inazio Bereziartua Musika Eskolak eta Danobat Group eta Goratu enpresek lagunduta.
Epaimahaiak Jesus Bilbaoren enpresa arloko ibilbide profesional luzea eta gaitasun ekintzailea nabarmendu ditu, “aurtengo irabazlea pertsona ekintzailea izateko jaioa da, ausarta eta sortzailea da, ekimen handikoa, eta, jubilatuta egon arren, proiektu berriei ilusioz ekiten diena”.
Ibilbide profesionalari dagokionean, epaimahaiaren hitzetan, Bilbaok “konpromiso eta inplikazio maila altua erakutsi du beti, lankidetzarako beharrezkoa den elkarrizketa eta negoziaziorako jarrera batez lagunduta”. Halaber, lurraldearekiko konpromisoa aipatu du epaimahaiak Bilbaoren ezaugarriak azpimarratzerakoan, Debabarreneko eskualdean abiatu baititu bere proiektu guztiak.
Arratsaldeko 19:00etan eman zitzaion hasiera ekitaldiari. Jesus Bilbaok Gemma Agirregomezkortaren eskutik jaso zuen Gure Balioak 2012 errekonozimendua, Juan Luis Baroja Collet artistaren eskultura. Aurretik, baina, bideo bat ikus ahal izan zen; bertan Jesus Bilbaoren adiskide eta lankideek honen ibilbide profesionala zein alde pertsonala goraipatzen zuten, gizarte balioekin lotuz.
Halaber, ekitaldian Gure Balioak egitasmoaren berri eman zuten Herritarren Foroko kideek. Proiektu honek Debabarreneko eskualdean gizarte-balioak sustatzea eta eskualde jasangarri eta lehiakor bat lortzeko bidean balioen garrantziaz ohartaraztea du helburu. Hain zuzen, azpimarratu eta sustatu nahi diren balioak integritatea, errespetua, ekintzailetasuna eta lankidetza-elkarlana dira.
Musikarik ez zen falta izan ekitaldian. Hala, Elgoibarko Musika Eskolako irakasle eta ikasle Maider Azurmendi eta Naroa Garcia biolontxelo-jotzaileek François Couperin konpositorearen bi pieza eskaini zituzten.
Joseba Palenzuela Mutrikuko Alkate eta Debegesa Garapen Agentziako presidenteak eman zion ekitaldiari amaiera. Bertaratutakoei eskerrak eman zizkien eta gogorarazi zien gizarte balioak sustatzeko garaia bizi dugula eta gutako bakoitzaren esku dagoela aldaketa hori gauzatzea.
JESUS BILBAOren ibilbidea
Jesus Bilbao Azpiri Elgoibarren jaio zen 1940. urtean. Gaztetatik erakutsi zuen arlo sozial eta kulturalarekiko kezka edo ardura. Hain zuzen, zinearekiko zaletasunak eraman zuen Elgoibarko zine-foruma bultzatzera, ONGARRI Kultur Elkartearen bitartez.
1956an hasi zuen bere ibilbide profesionala, Danobat enpresako bulego teknikoan, aprendiz-laguntzaile, eta bost urte beranduago, bulego teknikoko burua zen.
1966an Danobateko gerente izendatu zuten eta, 1967az geroztik, Maherco-ko Zuzendari Komertziala (Danobat, Eguzki eta Acme-Debaren arteko aldi baterako bateratzea). 1969an hiru enpresa hauek fusionatu -Danobat Sociedad Cooperativa- eta Danobat berrian Zuzendari Komertzial izatera pasa zen, eta lau urtez Batzorde Errektoreko Presidente.
60. hamarkadaren amaieran eta 70. hamarkadaren hasieran, Caja Laboral Popular-eko Batzorde Errektoreko kide ere izan zen. Halaber, Cruz Arriola eta Juan Gabilondorekin elkarlanean aritu zen Makina-Erreminten Fabrikatzaileen Espainiako Elkartea birsortzeko. Presidenteorde izan zen bertan.
1974an Danobat utzi eta makina-erremintaren alorreko enpresari batzuekin batera Maherholding eratu zuen. Juan Gabilondorekin batera, Zuzendaritza Orokorreko kide izan zen 2005ean jubilatu zen arte.
Garai honetan, hainbat kargu izan zituen eskumendeko enpresetan. Esaterako, Goratu enpresako Zuzendari Nagusi izan zen 8 urtez, 1994tik 2002ra. Gainera, Invema, Acomhe, Adegilan eta IMH-ko kontseilu edota Zuzendaritzatan parte hartu du.
Trantsizio garaian EKOR Euskadiko Enpresen Sindikatuko sustatzaile eta presidenteorde izan zen.
Era berean, Euskadin garrantzitsu diren bi zentro teknologikoren bultzatzaile eta sortzaile izan zen, Tekniker eta Fatronik. Batean zein bestean, Administrazio Kontseiluetan parte hartu zuen, kontseilari eta Presidente gisa.
Ibilbide profesionalaz gainera, bestelako ekimenetan ere parte hartu du Elgoibarren, arlo sozial eta kulturalean. Besteak beste, Elgoibarko Ikastolaren alde lan egin zuen diktadura garaian.
Gaur egun Fasys eta Anateusk proiektuetan dabil murgilduta. Anateusk berrikuntza sozialeko egitasmoa da, animalien eta ingurumenaren laguntzarekin terapiak garatzen ditu zehaztasun zientifikoz, minusbaliotasun edota gaixotasun bat duten pertsonen sendatze, prebenitze eta integratzea bilatuz.